Thursday, January 8, 2009

براس والديكم اقلبوا علينا هالصّحن



ينعنبو التطّرّف الدّيني وينعل جدّ بو العلمانيّة و مذهب بو العقلانيّة و اليمين واليسار و حتّي الوسط المعتدل و تحيا الحريّة...

الزّح الواحد ولّي السّتراس قاتلو و ولّى كلّ شيي يجي بش يقولو يخاف لا ترصّلو في سبّة و تطييح قدر و هذا بهيم و لاخر كافر ولا كان سلّكها يتحطّ علي اليمين الاستغلالي ولاّ اليسار اللي ما عادش لاموضة و يولّي الواحد منّا يسيّب كلّ شي و يقعد يحلف اللي هو خاطيه و يدافع علي روحو كاينّو قدّام محكمة ..

ولّيت كي نحكي مع مرتي ولا الاولاد و نقول "واللّه" نغزر منّا و منّا نقول يسمعنيش واحد يقول خوانجي وكان واحد استدعاك بش تعمل كاس تتفجع و تقلّو "اش تكلم بشويّا" ولّاشي الواحد متكتك ماللي يتكتب علي المدوّنات

أنا زعما في بالي بعد أكثر من عشرين سنة في الغربة سايي خرجت من القالب و من الضغوط متاع المجموعة و كسبت خبرة و ثقة في النفس تسمحلي بش نقرا و نتبسّم لكن في هذا الفضاء الافتراضي متاع تن بلوغ كلّ حدث يولي ليه دعوة بالدين و اللا دين تبداشى بصّة و تقول كيفاش اختيار شخصى كيما هذا يولّي بهذه الأهمية تي هاو الحكاية فاتت الكورة و حتّي محبّين الترجي و الأفريقي ما عادش لاقين فضاء يتكلموا فيه يتعاركو و يسبّوا بعضهم فيه علي راحتهم , موضوع شخصي كيف الدين و اللا دين احتكر هذا الفضاء و شلّو و زيد فوق من هذا الموضة انك كان حكيت حكاية ما عندهاش دعوة بالدين ولا بغزّة يجيوك الجماعة متاع الوعض والارشاد و يعطييوك بالبوكس عي مناخيرك... تي ما لاحظتوش قدّاش من مدوّن بطّل يكتب وهذا في حدّ ذاته نوع من الصنصرة والقمع

لكن الحمدالله مشيت عملت حصص عند البسي و رجّعني للطريق الصواب الا وهو الحرية ,الحرية في ما أفكّر و في ما أفعل و في ما أحلم و في ما أحب و في ماأكره و مع من أتفاعل , و مع هذا ساحترم و أقري كل ما يكتب في هذا الفضاء و لن أحكم علي الاشخاص ولن احاول حتي أن أعرف هل هم من محبّي الترجّي أو الافريقي أو حتّى النّجم السّاحلي..

تحيا الحرّية و يسقط القالب

11 comments:

عاشور الناجي said...

حوت عليك

أرابيـكا said...

تحيا الحرية

kheldouna said...

يرحم هاك الفم .. تي وين كنت
تحيا الحرية و التفكير الحر

24Faubourg said...

3andek alf 7a9...hatta ena kont nkhammem kifech bech n9oulha...

Big Trap Boy said...

تحيا الحريّة ومعاها الترجي

3amrouch said...

تحيا الحريّة ومعاها الافريقي ايااه

ferrrrr said...

اخطاكم الاثنين، تحيا الحرية و معاها الملعب التونسي

WALLADA said...

أخطاكم الثلاثة ، تحيا الحريّة تفكير و ممارسة موش شعار

Gouverneur de Normalland said...

:)))

هاي توة ولاتشي مساندة ال99 في المئة الي تعز عالتوانسة الكل ؟

بلاهي لاتغيب علينا يا سمسوم

ART.ticuler said...

أحسن تعليق على الأطلاق (وباش مانطيحش في فخ النسبية،نقول:حسب رأيي :-) ) هو تعليق ولادة.. وشعارفي المطلق ينجم أي واحد يركب عليه ويكفي إلقاء نظرة على أصحاب التعاليق إلي في مدوناتهم يتحاربو وهنا الناس الكل راضين بالحرية والترجي

Clandestino said...

اينعم سمسوم
تحيـــا الحرّية

و يسقط معز ادريس و زعبوب